Postdoktorstilling (86344) – Universitetet i Bergen

Postdoktorstilling ved Institutt for arkeologi, historie, kultur- og religionsvitskap

Det er ledig ei treårig stilling som postdoktor ved Institutt for arkeologi, historie, kultur- og religionsvitskap knytt til prosjektet TRACSYMBOLS.

Om stillinga

Målet for prosjektet er å undersøkje korleis nøkkelinnovasjonar for åtferd oppstod hjå Homo Sapiens og Homo Neanderthalensis i det sørlege Afrika og Europa, og korleis miljømessig variasjon har påverka denne utviklinga i perioden mellom 180-25 ka. Prosjektet er finansiert av European Research Council (ERC) og Universitetet i Bergen og prosjektperioden er 2010-2015. For meir informasjon om prosjektet, sjå nettstaden:

http://tracsymbols.eu/

Tilsetting i postdoktorstilling har som hovudmål å kvalifisere for arbeid i faglege toppstillingar. Postdoktorstillinga er ei åremålsstilling med tilsettingsperiode i 3 år. Ingen kan verte tilsett i meir enn ein åremålsperiode ved same institusjon. Det er en føresetnad at arbeidet vert gjennomførd innanfor perioden som postdoktorprosjektet varer.

Kvalifikasjonskrav

Det vert kravd norsk doktorgrad med spesialisering i zooarkeologi eller tilsvarande utanlandsk utdanning for tilsetting i stillinga. Det er mogeleg å søkje stillinga utan å ha disputert, men det er eit krav at doktoravhandlinga er levert til bedømming innan søknadsfristen er ute. Graden må vere oppnådd før tilsetjing kan skje. Den som blir tilsett må

• ha publisert innan forskingsfeltet
• meistre engelsk flytande skriftleg og munnleg.
• ha evne til å arbeide i tverrvitskaplege team

Søkjarar med spesialisering fra zooarkeologisk analyse av sør-afrikansk MSA (Middle Stone Age) faunamateriale og bakgrunn frå afrikansk, og særleg sør-afrikansk faunaanalyse vil verte føretrekte. Forskingsinteresse innan beinmateriale, isotop- og faunaanalyse vil vere ein føremon.

Løn

Løn etter lønssteg 57 (kode 1352/Lønsramme 24) i statens lønsregulativ, for tida kroner

468 400,- pr. år. Vidare opprykk skjer etter tenesteansiennitet i stillinga.

Tilsetjing i stillinga krev at ein har sin daglege arbeidsplass ved Universitetet i Bergen og rettar seg etter dei retningslinene som til kvar tid gjeld for stillinga.

Utfyllande opplysningar om stillinga kan ein få ved å vende seg til prosjektleiar professor Christopher Henshilwood, e-post: Christopher.henshilwood@ahkr.uib.no, eller instituttleiar professor Christhard Hoffmann, tel. +47 55 58 89 43, e-post: christhard.hoffmann@ahkr.uib.no.

Andre opplysningar

Det må påreknast deltaking i utgraving/feltopphald i Sør-Afrika. Faunamateriale som vil vere sentralt i prosjektet er funne på tre arkeologiske lokalitetar i Sør-Afrika.

Kvinner vert spesielt oppmoda om å søkje. Dersom dei sakkunnige finn at fleire søkjarar har tilnærma like kvalifikasjonar, vil reglane om kjønnskvotering i personalreglementet for vitskapelege stillingar verte følgde.

Den statlege arbeidsstyrken skal i størst mogleg grad spegle mangfaldet i befolkninga. Det er difor eit personalpolitisk mål å få ei balansert alders- og kjønnssamansetjing og rekruttere personar med innvandrarbakgrunn. Personar med innvandrarbakgrunn blir oppmoda om å søkje stillinga.

Universitetet i Bergen nyttar meirinnsyn ved tilsetjing i vitskaplege stillingar. Opplysningar om søkjaren kan verte gjort offentlege sjølv om søkjaren har oppmoda om ikkje å bli ført på søkjarlista. Dersom oppmodinga ikkje vert teken til følgje, skal søkjaren varslast om

dette.

Slik søkjer du stillinga

Søknaden skal sendast elektronisk via link på denne sida «SØK PÅ JOBBEN». Søkjarane skal nytte det elektroniske CV-skjemaet som ein finn der. I tillegg må dette følgje søknaden:

1. Prosjektomtale (inntil 5 sider)

2. Framdriftsplan for prosjektet

3. Litteraturliste for prosjektomtalen

4. Eit kort samandrag av doktoravhandlinga (inntil 5 sider)

5. Vitnemål frå universitet/høgskole som dokumenterer relevant utdanning for søknaden (skanna versjon)

6. Liste over vitskapelege arbeid

7. Representative vitskapelege arbeid, inntil 5.

8. namn og kontaktinformasjon for minst to referansepersonar

Vedlegga kan vere i Word- eller pdf-format. Dei vitskapelege arbeida, inkludert liste over desse, (alt i 3 eksemplar) skal sendast pr. post til Universitetet i Bergen, Institutt for arkeologi, historie, kultur- og religionsvitskap. Dei vedlagde vitskapelege arbeida og vitnemål må vere på eit skandinavisk språk eller engelsk. Vitskapelege arbeid og omsetjingar av vitnemål og vitskapelege arbeid må vere sendt til instituttet innan søknadsfristen.

Spørsmål om den elektroniske søkeprosedyren kan sendast til Det humanistiske fakultet på

e-post: post@hf.uib.no

Søknadsfrist 10.10.2012

Merk søknaden 12/9997 Nettside: www.uib.no Elektronisk søknad sendes via Jobbnorge: [Klikk her]